CITB yn hyrwyddo recriwtio cynhwysol drwy lwyddiant prosiect Mind the Gap

Mae’r prosiect wedi creu dros 170 o gyfleoedd gwaith i bobl ag euogfarnau, gan gynhyrchu gwerth cymdeithasol o dros £3.5 miliwn

Mae Bwrdd Hyfforddi’r Diwydiant Adeiladu (CITB) wedi cyhoeddi canlyniad yr astudiaeth effaith gymdeithasol annibynnol ar y rhaglen ‘Mind the Gap’, a gyflwynwyd yn llwyddiannus. Dyluniwyd y rhaglen i agor llwybrau newydd i unigolion ag euogfarnau i fynd i mewn i’r diwydiant adeiladu – gan helpu i fynd i’r afael â phrinder sgiliau yn y sector wrth gefnogi symudedd cymdeithasol.

Lansiwyd y rhaglen wreiddiol yn 2017 ac fe'i harweiniwyd gan BeOnsite, a sefydlwyd gan Lendlease yn 2007 fel cwmni pwrpasol, dielw. Roedd y prosiect yn mynd i’r afael â dwy her frys: sicrhau creu swyddi cynaliadwy yn y diwydiant adeiladu a lleihau ail-droseddu.

Dros dair blynedd, creodd y buddsoddiad o £720,000 ymyriadau gwasanaeth cadarnhaol a chefnogaeth i gyflogwyr, y system cyfiawnder troseddol, carcharorion presennol ac unigolion sydd wedi eu rhyddhau o garchar ar draws Lloegr. Bu Mind the Gap yn gweithio gyda 400 o gyflogwyr a 795 o ymgeiswyr, gan arwain at 172 o gyfleoedd gwaith a 75 o ganlyniadau cyflogaeth cynaliadwy – gan ragori ar ei dargedau gwreiddiol.

Mae’r gwerthusiad cymdeithasol annibynnol yn awgrymu bod Mind the Gap wedi creu gwerth cymdeithasol o £3,536,000 rhwng 2017 a 2020 drwy helpu cyn-garcharorion i gael swyddi a lleihau ail-droseddu, gan leihau’r ddibyniaeth ar gyllid cyhoeddus. Nododd prif ganfyddiad yr adroddiad fod y rhaglen wedi llwyddo i ddangos gwerth y grŵp hwn fel ffynhonnell gweithwyr wrth ddarparu gwerth cymdeithasol sylweddol i’r Llywodraeth ac eraill.

Adroddodd pobl a gafodd eu cyflogi drwy’r rhaglen am ystod o newidiadau a brofwyd ganddynt, gan gynnwys lles personol gwell, perthnasoedd gwell, a sgiliau technegol gwell. Nododd gweithwyr yn benodol datblygiad sgiliau gwaith, hyfforddiant ar lythrennedd ariannol, a darpariaeth rhwydweithiau cymorth fel elfennau allweddol o’r rhaglen Mind the Gap a’u helpu i gael gwaith.

Roedd llwyddiant y prosiect yn deillio o’i ddull cydweithredol, gan weithio ar draws y system cyfiawnder troseddol a chyflogwyr adeiladu i ddylunio, profi a chyflwyno hyfforddiant a chefnogaeth hirdymor. Dangosodd y prosiect fod modd i gyflogwyr, drwy wella dulliau recriwtio a manteisio ar gronfa dalent fwy amrywiol, ddiwallu eu hanghenion gweithlu a chyfrannu at newid cymdeithasol ystyrlon.

Dywedodd Jessica Mellor-Clark, Pennaeth BeOnsite: “Y cydweithio oedd cyfrinach llwyddiant Mind the Gap. Rydym yn falch o fod wedi dod â’r Llywodraeth, busnesau, cyrff statudol a sefydliadau’r trydydd sector ynghyd i greu newid parhaol.”

Helpodd Mind the Gap hefyd i osod y sylfeini ar gyfer Rhwydwaith Dyfodol Newydd y Weinyddiaeth Cyfiawnder, a lansiwyd yn 2018 i gysylltu carchardai â chyflogwyr a llenwi bylchau sgiliau lleol. Chwaraeodd BeOnsite, arweinydd prosiect CITB, rôl allweddol wrth hyrwyddo’r prosiect drwy ddigwyddiadau cyflogwyr a charchardai a thrafodaethau crwn.

Datgelodd Rhagolwg Gweithlu Adeiladu CITB 2025–29 fod angen 47,860 o weithwyr ychwanegol y flwyddyn ar y diwydiant i fodloni’r galw a ragwelir, felly mae angen ystod eang o atebion i lenwi’r bwlch hwn.

Dywedodd Adrian Beckingham, Cyfarwyddwr Strategaeth a Pholisi CITB: “Mae gan y diwydiant adeiladu amrywiaeth o gyfleoedd i bobl o bob math o gefndiroedd. Drwy greu llwybrau newydd i’r diwydiant i bobl ag euogfarnau, rydym nid yn unig yn helpu unigolion i ailadeiladu eu bywydau – rydym hefyd yn helpu cyflogwyr i gael mynediad at dalent heb ei ddefnyddio.”

“Mae Mind the Gap yn enghraifft bwerus o’r llu o atebion y mae angen eu hystyried i fynd i’r afael â phrinder sgiliau wrth wella bywydau pobl, ac fe fydd yn llywio prosiectau eraill rydym yn gweithio arnynt ac, yn ei dro, polisïau’r Llywodraeth. Gyda bron i draean o gyflogwyr adeiladu yn nodi prinder sgiliau fel her allweddol, mae’n hanfodol ein bod yn ehangu ein gorwelion recriwtio ac yn adeiladu gweithlu sy’n adlewyrchu amrywiaeth ein cymdeithas.”

Wrth i CITB barhau i gefnogi’r diwydiant adeiladu i adeiladu gweithlu medrus, cymwys a chynhwysol, bydd gwersi Mind the Gap yn llywio mentrau’r dyfodol sy’n anelu at wella arferion recriwtio ac ehangu mynediad at gyfleoedd.